文：林喜／
（轉載自澳門日報）
文化消費唔單係藝術享受，更是某種身份認同或炫耀——Lady GaGa演唱會嘅飛已成為身份象徵，甚至連邊個唱、唱乜嘢都已不再重要。林樂要政府對「演藝場地嘅容量規劃亦應以大珠三角嘅文化消費人口作為參考基數」， 林喜有保留，因為從產業角度睇，所謂「文化消費」係一場「營銷」遊戲，文化藝術同珠寳、手袋差唔多，都係交易嘅商品而已，而遊戲重點在於品牌、包裝、行銷……呢碗大茶飯，溫吞慢火嘅澳門人食唔食得落先？講起班內地自由行，佢哋嘅荷包嗰班賭場大鱷一早已虎視眈眈，只要有錢搵，你慌佢哋唔會起多幾間金光綜藝館？反而林樂促請政府提升文化軟硬件，滿足本土演藝發展需要，林喜覺得確係當務之急。
講起文化產業，梗係要短打下啱啱喺澳門文化中心落幕嘅《hamlet b.》啦！呢齣陳炳釗「消費時代系列」三部曲嘅最終章，似係對藝術、藝術創作者與文化產業、消費主義之間糾纏不清嘅關係，來一次終極顛覆演繹。戲以「文化消費者」身份出現嘅港女奧菲莉亞話「若你們想迎合我的品味趁機大賺一筆的話，首先要追得上我的步伐」，聽落眞係極之弔詭：文化消費者不停追逐文化生產者，願為之付出大把鈔票；但文化生產者要令文化消費者沉迷，首先就要追得上文化消費者，咁其實……大家究竟係邊個追緊邊個？
