選段一：《遠方》FAR AWAY
原著： 邱琪兒Caryl Churchill
中文翻譯： 胡開奇
廣東話翻譯： 馮程程
第三幕
△ 若干年後。HARPER的家。白天。
HARPER 你毒死啲黃蜂係岩嘅。
TODD 係，所有黃蜂都要死。
HARPER 尋日我喺出面個樹林側邊，有一個黑影向我移過嚟，原來係一群蝴蝶，停左喺我上面，樹林同草叢都變成紅色。其中有兩隻伏左喺我手臂，我好驚，有一隻飛左入我啲頭髮度，最後我拍死左佢。
TODD 我唔覺得蝴蝶有咩問題。
HARPER 佢地可以嬲冚哂你成塊面。以前羅馬人用金樹葉嚟自殺，將佢輕輕拍入喉嚨，塞住成條氣管，見到啲蝴蝶，我就諗番起。
TODD 我經過一個果園，有幾隻馬企喺樹下面，突然間，啲黃蜂由葡萄林裡面飛出嚟襲擊啲馬。啲馬尖叫，亂跑，成個頭都俾啲黃蜂嬲冚哂。我希望佢快啲瞓醒。
HARPER 我地都唔知道佢究竟行左幾多路。
TODD 佢番嚟係啱架。
HARPER 冇人會喺打緊仗嘅時候就咁走咗去。
TODD 如果逃走就會。
HARPER 我地都唔知道佢喺度逃走。
TODD 佢要去一個安全嘅地方嚟整理一下自己。
HARPER 呢度係安全嘅地方？
TODD 相對嚟講一定係。佢地以為呢度只係一間屋。
HARPER 貓已經加入咗，企響法國人嗰一邊。
TODD 我從來都唔鐘意貓，佢地一陣除，拗身拗勢，佢地鐘意你只不過因為你會餵嘢佢食，佢地仲會咬人，我養過一隻貓，佢會失驚無神咬你幾啖。
HARPER 你知唔知佢地一直喺度殺死啲BB。
TODD 喺邊度？
HARPER 喺中國。趁冇人見到，跳入BB床。
TODD 但係有啲貓係ok嘅。
HARPER 我唔覺得。
TODD 我識得公路對出有一隻貓。
HARPER 唔係，你小心啲好。
TODD 但係我地呢一邊其實唔係真係同法國人敵對架，佢地唔似得摩洛哥人同螞蟻。
HARPER 佢地唔似得加拿大人、委內瑞拉人同蚊。
TODD 佢地唔似得工程師、廚師、細過五歲嘅細路、音樂家。
HARPER 汽車推銷員。
TODD 葡萄牙汽車推銷員。
HARPER 俄羅斯泳手。
TODD 泰國屠夫。
HARPER 拉脫維亞牙醫。
TODD 唔，拉脫維亞牙醫喺古巴做咗唔少好事。佢地喺Havana對出有一間屋。
HARPER 不過拉脫維亞將啲豬運去瑞典。牙醫同國際牙醫業關係密切，仲效忠於佢地，喺Da res-Salaam嘅牙醫亦都係一樣。
TODD 我地唔爭論Da res-Salaam。
HARPER 你想為Da res-Salaam嘅屠殺辯護？
佢走嚟呢度，係因為你喺呢度休假，如果被人發現我好大責任。
TODD 只係過埋聽日啫。我一陣叫佢起身。俾佢瞓多幾分鐘。
HARPER 你有冇睇到關於鱷魚嗰個節目？
TODD 有－－不過，鱷魚……你睇下佢地點樣照顧自己嘅BB，佢地會將鱷魚BB擔喺口裡面然後游落河。
HARPER 所有人都會幫自己嘅仔女架啦。
TODD 我只係想話，即使鱷魚真係過咗嚟我地事但一個盟友呢邊，我都唔會唔安樂。嘿，冇嘢可以阻擋佢地。
HARPER 鱷魚好邪惡，同鱷魚做敵人點都冇錯。佢地層皮，佢地棚牙，口裡面擔住嘅腐肉所發出嚟嘅臭味。鱷魚等斑馬過河嘅時候先至襲擊佢地最瘦弱嗰幾隻，擘大個口咬實唔放，將佢地拉落水。鱷魚趁夜晚攻擊啲村莊，擔走床上面嘅細路。一隻鱷魚擔住幾十個頭帶番河裡面，好似好溫柔咁擔住自己嘅BB咁，之後由得呢ｄ戰利品喺水面浮浮沉沉，直至佢地腐爛。
TODD 我只係想話我地可以利用佢地呢一點。
HARPER 嗰啲毛seng seng好可愛嘅水鳥，最細嗰一隻被人賴低左，喺度叫等埋我，等埋我。水鳥媽媽為左救佢地會寧可連自己條命都唔要。
TODD 要唔要計埋綠頭鴨入去？
HARPER 綠頭鴨唔係好嘅水鳥。佢地會強姦，佢地企喺大象同韓國人嗰一邊。但係鱷魚一直喺度做壞事。
TODD 你覺得我應該叫佢起身，定係由佢繼續瞓？我地冇時間嘞。
HARPER 你同唔同意我對於鱷魚嘅睇法？
TODD 乜嘢事呀宜家？你唔知我企喺邊一邊咩？
HARPER 我唔知道你嘅諗法。
TODD 我嘅諗法就係我地大家嘅諗法。
HARPER 就講鹿。
TODD 你指好sweet嘅小鹿班比？
HARPER 你講緊反話？
TODD 我講緊挖苦嘅說話。
HARPER 因為佢地突然間喺公園度跑出嚟，喺山上面跑落嚟，喺商場度搗亂。當你向佢地開槍，啲雌鹿逃走嗰陣就撞向啲人度，用佢地惡毒而且閃令令嘅蹄踩死啲人，而啲鹿仔就會阻住啲顧客逃生嘅去路，令佢地全部跣哂落扶手電梯度，年青嘅公鹿就乘機發狂咁撞向啲玻璃窗度──
TODD 我知道我要憎恨鹿。
HARPER 仲有年老嘅鹿，佢地衝出街上面，用鹿角纏住啲年青人，你知唔知佢地隻角有幾重，角尖有幾鋒利？
TODD 知，我當然知道。
△ 他拉起襯衣，露出一條疤痕。
HARPER 係鹿？
TODD 其實係熊人。我唔鐘意俾人懷疑。
HARPER 係當大象投靠咗荷蘭人之後。我係曾經咁相信大象。
TODD 我喺埃塞俄比亞殺過牛同埋細路。我向西班牙人、電腦programmer同埋狗組成嘅聯合部隊發放毒氣。我用雙手將椋鳥撕開。我鐘意用自己雙手去做。所以唔好認為我唔可靠。
HARPER 我並唔係話你唔識得殺。
TODD 而我知道咁唔係純粹為左追求刺激。幾悶嘅工作我都做過。我曾經喺屠房負責打暈啲豬同音樂家，每日放工嘅時候你會做到腰酸背痛，同埋每次你合埋眼你只會見到好多人被人倒吊嘅情景。
HARPER 所以你會認為鹿係邪惡嘅？
TODD 呢樣嘢我地已經討論過。
HARPER 如果一隻好肚餓嘅鹿走左入嚟後園，你唔會俾嘢佢食？
TODD 當然唔會。
HARPER 我唔明呀宜家鹿已經同我地同一陣綫。佢地喺度已經三個禮拜。
TODD 呢樣我唔知。係你自己講。
HARPER 佢地流露出善良嘅本性。你望住佢地一對好溫柔嘅啡色眼睛就會明白。
TODD 咁咪好囉。
HARPER 你憎恨鹿。你欣賞鱷魚。
TODD 我一時亂咗，因為我其實好攰。
HARPER 唔該你走。
TODD 我係你屋企人。
HARPER 你覺得我有瞓過咩？
△ JOAN走進來，投進TODD的懷抱。
HARPER 你唔可以留喺呢度，佢地會嚟捉你番去。當你番番去你會點講？話你因為想見自己嘅老公一日所以逃走？每個人都有自己鐘意嘅想見嘅人，或者寧願去見一啲人都好過留喺一個洞穴入面等螞蟻嚟咬。定係你點都唔會番番去如果係咁你不如宜家就一槍打死我。有冇人見到你走出嚟？你由邊一面嚟？有冇俾人跟蹤？呢度有鶚，佢地可能已經見到你嚟。你喺度搵命搏因為你根本乜野都唔明因為佢講嘅嘢根本係錯架。唔通你一啲都冇所謂？可能連是非黑白你自己都唔識分，兩年嘞我點知你宜家變成點，我希望自己見番你會好開心，但係你以為我可以咩？
JOAN 啲雀仔肯定見到我，所有人都見到我向前行但係冇人知點解，我可以係喺度執行緊任務，所有人都喺度周圍行但係就冇人知道點解，而事實上我殺左兩隻貓同一個細過５歲嘅細路，咁同執行任務冇乜分別，而我唔明白點解我唔可以行開一日。今日之後我就會番番去直至死我都唔會再走。我其實驚嘅唔係雀仔，而係天氣，呢度嘅天氣宜家已經企左喺日本人嗰一邊。山上面到處行雷閃電，我經過以前從未去過嘅城鎮。老鼠嘅口同耳喺度流血，咁係好事，路邊嘅女仔都喺度流血。喺嗰度真係好唔方便因為所有嘢都被徵用哂，嗰度有一冧二冧嘅屍體，如果你行埋去睇真啲你就會發現嗰啲人係俾咖啡殺死，或者俾大頭針殺死，或者係俾海洛英、氣油、電鋸、噴髮膠、漂白水、毛地黃、同埋我地平時燒雜草嘅時候嗰啲濃煙嘅氣味殺死。波利維亞人同地心吸力合作，佢地封鎖咗呢個消息如果唔係一定會引起恐慌。但係我地同噪音一路咁推進，喺馬達加斯加成千上萬條光線已經滅亡。邊個會嚟動員黑暗同寂靜？一到夜晚我就會諗住呢件事。到左第三日我已經攰到行唔郁但係我終於嚟到河邊。上游有智利軍隊喺度紮營但係佢地冇發現我，有十四隻黑白色嘅牛喺下游飲緊水所以我知道我一定要就咁喺中游橫過條河。但係我唔知道呢條河係企喺邊一邊，佢可能會幫我游過去亦都可能會浸死我。喺河中心，水流特別急，河水係啡色嘅，我唔知咁係咪意味住一啲嘢。我喺河邊企左好耐。但我知道咁係我可以嚟到呢度嘅唯一方法所以最後我將一隻腳伸入河裡面。啲水好涷，只係咁啫。啱啱踏隻腳入去你冇辦法知道會發生咩事。無論如何，水都會浸過你嘅腳踭。
